Ente Fueyes enllena ochobre de lliteratura n’asturianu

Siete actividaes componen la segunda edición de ‘Ente Fueyes. Ochobre Lliterariu’, qu’arranca esta fin de selmana y va poner el ramu’l día 27. La Fundación Foro Jovellanos del Principado de Asturias incorpórase a esti ciclu entamáu pol Conceyu nel que tamién participa Política Llingüística, l'Academia de la Llingua Asturiana (ALLA) y el Mercado Ecológico y Artesano.

“Ye un programa que naz a partir d’una iniciativa del Principáu que ye ‘Asturies, Cultura en Rede’, nesti casu’l circuitu d’autores n’asturianu, que dende la Fundación usamos p’afitar un programa propiu qu’aprovecha parte d’esi ciclu del Principáu y aparte incorpora coses nueves” gracies a diches collaboraciones, esplicó Miguel Barrero, direutor de la Fundación Municipal de Cultura, Educación y Universidá Popular, na presentación de les actividaes celebraes esta mañana nel Centru de Cultura Antiguu Institutu. Xunto a él, Antón García, direutor xeneral de Política Llingüística; María Xosé Rodríguez López, responsable de la Oficina de Normalización Llingüística; Pablo Xuan Manzano, académicu de l’ALLA; y Javier Ruiz-Cuevas, presidente de l'Asociación Mercado Artesano y Ecológico, que nun tomó la pallabra.

Una capacidá, la del Conceyu d’aprovechar la oportunidá qu’ufre Autores nel Camín “pa implementar esa actividá lliteraria y facer con ello unos alcuentros na seronda de mayor interés”, qu’emponderó García. “Lo que consiguimos”, en comuña con otres entidaes, dixo, “ye caminar con pasu firme nesi camín de la normalización; qu’ofrecer una serie d’actividaes n’asturianu sía normal y habitual”.

Día de les Escritores, na Plaza Mayor

Rodríguez López encargóse de detallar les actividaes que se van desendolcar estos díes, les primeres nel Mercado Artesano y Ecológico que va tener llugar el sábadu y el domingu na Plaza Mayor, llugar onde, al igual que l’ochobre pasáu, va conmemorase’l Día de les Escritores. “Esti añu ta dedicáu a les guerres, a los conflictos; enantes, demientres y depués del conflictu. La Biblioteca Nacional –institución qu’afitó’l 17 d’ochobre como xornada pa esta celebración– propunxo una serie d’escritores, de periodistes, que tienen obres sobre esti tema. Dende la Oficina lo que fiximos foi traducir al asturianu los testos que se proponíen y diseñar cartelos cola imaxe de la escritora y el testu n’asturianu y castellanu”, esplicó.

Ente les autores escoyíes pola Biblioteca Nacional de España tán una gallega, Luz Pozo, y otra catalana, Montserrat Roig, que tamién van tar tornaes al castellanu amás d’al asturianu. “Y depués Xosefa Xovellanos va ser el filu conductor y representante de les lletres asturianes”, añadió la responsable del SNL, polo que se van entamar actividaes nel mercáu pa dar a conocer la so figura.

Biografía de Xovellanos y conciertu poéticu

José Ángel Gayol va participar en ‘Ente Fueyes. Ochobre Lliterariu’ el llunes 17 pa presentar ‘La cafiante muerte de Nicolai Bostov’, obra cola que ganó’l XLII Premiu Xosefa Xovellanos de novela n’asturianu, mentes que Ramón d’Andrés va acudir en dos ocasiones: la primera’l xueves 20 pa dar a conocer ‘Una ciencia ensin enfotu’, XXVII Premiu Máximo Fuertes Acevedo d'ensayu, y el xueves 27 la Biblia, I Premiu Florina Elías a la meyor traducción, en representación de la Sociedad Bíblica y del ampliu equipu que trabayó nesta torma. Estes trés actividaes y les trés restantes van principiar a les 19 hores, siempre nel salón d’actos de la Escuela de Comerciu.

Les dos novedaes d’esta edición son una collaboración col Foro Jovellanos del Principado de Asturias y el conciertu ‘Poética d’un carbayu’. La primera ye una torna al asturianu fecha pola Oficina de Normalización Llingüística de la ‘Biografía de Jovellanos’ de José Miguel Caso, con anotaciones de la so fía, María Teresa Caso, el martes 18, mentes que l’eventu del 25 consiste nuna actuación d’Ana Lamela y Carla Miranda Rodríguez na que faen sonar a poemes de Julia Navas, Alfredo Garay, Ángeles Carbajal, Pedro Luis Menéndez, Vanessa Gutiérrez, Marta Mori, Esperanza Media o Armando Vega.

Completa esti ciclu la presentación, el llunes 23, del númberu 38 de ‘Lliteratura’, con un especial de microrrellatos, que ye un homenaxe al númberu 1 de la revista y al so direutor primeru, Xosé Bolado, fináu nel 2021. “Ye mui prestoso pa l’Academia participar nestes xornaes lliteraries”, espresó Manzano, que detalló los conteníos de la espublización.

Na semeya, Manzano, García, Rodríguez López, Ruiz-Cuevas y Barrero.