Enrame de fontes y nueche de fogueres

Esti domingu celebramos la nueche más máxica del añu, na que'l fueu y l'agua son protagonistes. Ye la Nueche de San Xuan.

Les fogueres d'esta nueche celebren el solsticiu de branu, anque realmente foi nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista.

 Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía mui viva nel país.

Esta nueche tamién ye l’únicu momentu d’atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

El programa pa esti día, amás de les fogueres en delles parroquies xixoneses, ye:

• 18 h / Plaza d'Italia, Grupu Folclóricu La Alegría
• 19.30 h / Campu Valdés, Banda de Música de Xixón
• 21 h / Plaza del Marqués, Andecha de Cultura Tradicional Na Señardá, col Enramáu de la Fonte
• 22.45 h / Playa de Poniente, Banda de Gaites Noega
• 23.15 h / Playa de Poniente, Banda de Gaites Villa de Xixón
• 23.50 h / Playa de Poniente, Fueos artificiales
• 00 h / Playa de Poniente, Foguera