El XXIX Conciertu pola Oficialidá va facese en Xixón esti sábadu 17 de xunu

Una 'Tarde en danza' y l'actuación de Rodrigo Cuevas, l'artista asturianu de más éxitu de los últimos tiempos, novedaes principales de la cita musical-reivindicativa. Van actuar LaKadarma, Caldo y Os Rabizos, Herbamora, Cantaruxare, Rodrigo Cuevas, Spanta la Xente, Dixebra y Misiva.

El Conciertu pola Oficialidá qu'entama cada añu la Xunta pola Defensa de la Llingua Asturiana llega a la XXIX edición y vuelve axuntar reivindicación y folixa. Esti añu la cita con ún de los principales festivales musicales d'Asturies, va ser el 17 de xunu nel Parque Inglés de Xixón. Esi día, a partir de les 18.00 hores, van volver vivise más de siete hores de bona música al mesmu tiempu que s’esixen los derechos que tien que tener la llingua asturiana nel nuestru país.

Esti añu, como novedá, pela tarde va preparase una adaptación de les existoses Nueches en danza pal horariu vespertín, onde los grupos Caldo y Os Rabizos, Herbamora, Cantaruxare van ufrir una actuación mui especial na que tolos asistentes van poder baillar y blincar colos nuestros sones más tradicionales.

Nesta XXIX Conciertu pola Oficialidá tamién va actuar  Rodrigo Cuevas, l'artista de más sonadía dientro del panorama de la escena sonora asturiana, que pela primer vez pa ufrir el so espectáculu nel escenariu musical-reivindicativu del Conciertu pola Oficialidá.

A estos nomes súmense los de LaKadarma, formación naveta que nos últimos años ta revolucionando'l mundu de les bandes de gaites; los l.lenizos Spanta la Xente, ún de los grupos de más sonadía de los Valles Mineros; Dixebra, tou un clásicu que tán de xira de conmemoración de los sos trenta años; y los moscones Misiva, una banda de punk-rock con una bona montonera de conciertos al llombu.

El Conciertu pola Oficialidá ye un conciertu reivindicativu entamáu pola Xunta pola Defensa de la Llingua Asturiana pa reclamar la oficialidá pal asturianu. Vien celebrándose dende 1989 en dellos llugares de la xeografía asturiana.