El Xardín Botánicu Atlánticu entama un programa d'actividaes pa tolos públicos pol equinocciu de seronda

A les 9.50 hores del llunes va tener llugar l'equinocciu de seronda y el Xardín Botánicu Atlánticu prepara numberoses actividaes pa celebralu. Éstes van centrase na xornada del domingu, con entrada llibre a la instalación pa les persones que se treslladen n'autobús.

Talleres, música, visites guiaes, teatru, gymkhana… L'equinocciu de seronda va venir cargáu d'actividaes pa tolos públicos nel Botánicu.

• TALLER INFANTIL: con Desfaciendo Maíz. De 12 a 13.30 hores

Percorríu pela zona de frutales pa identificalos y conocer les sos carauterístiques. Darréu, fabricaremos saquinos perfumaos con cortezos de naranxa deshidrataos, llana natural d’oveya, frutos y fueyes d’ocalitu y con arume a menta. Pa terminar, habrá preba de zusmiu de naranxa natural. Llargor: 90 minutos.

Preciu: 6 € (-15 por cientu pa socios Club Miruéndanos)

Aforu: 25 neños y neñes d’ente 6 y 12 años. Ye necesario inscripción previa nel propiu Botánicu o na páxina web.

• Preba: ZUSMIOS NATURALES, con David Fernández-Prada (Gustatio). 12 hores

Preba de zusmios naturales de fruta recién estrucío. Van prebase cuatro zusmios diferentes –caún ellaboráu con delles frutes, dalgunes exótiques– xunto cola fruta nel so estáu natural, pa poder contrastar los sos sabores distintos y les sos testures. Mentanto qu’esfrutamos de cada zusmiu, falaremos de los sos trazos, les vitamines y los beneficios pal organismu.

Preciu: 4,00 € (inclúi la entrada al Botánicu)

Aforu: 50 persones

• Conciertu: CUARTETO MARCATO. 13.30 hores

Cuatro músicos xóvenes del norte del Estáu que, depués de participar nuna montonera de recitales académicos, dan el saltu profesional nel Botánicu. Bandes sonores y pieces de música clásica nun recital pa tolos públicos.

Sofia Trueba Fraile (violonchelu)

Iñigo Martínez Ayarza (viola)

Gonzalo Saloña Urigüen (vigulín)

Alejandro Jardón Bueno (xiblata)

• Gymkhana familiar: “A LA GUETA L’AYALGA”. De 17 a 19 hores

L'Asociación de Amigos del Jardín Botánico entama, un añu más, un percorríu familiar nel entornu privilexáu que nos ufre la viesca natural. Una busca didáutica y prestosa pel Xardín de la Isla que tien premiu pa los neños y neñes: deprender coses nueves sobre la naturaleza y la botánica (árboles, flores, plantes en xeneral) demientres escubren los requexos del Xardín Botánicu.

• Teatro: “BASURILLA” con La Sonrisa del Lagarto. 19.30 hores

Espectáculu interactivu familiar. Una basurera simpática tresforma les montañes de basoria que xeneramos n’oxetos y xuguetes prestosos. Les coses más simples y cotidianes garren vida y enllénense d’hestoria cuando’l maxín entra en xuegu.