El V Festival Escenines pa la Reciella trai cuatro actividaes esta Navidá

Van desendolcase en Xixón del miércoles al sábadu, cuando van presentase en conciertu los cantares del discu 'Bestiariu 3'.

La representación que va encargase d'abrir esti añu Escenines pa la Reciella, festival que vien entamando 'Reciella. Families pol Asturianu' dende hai cinco años, ye enforma especial, yá que va ser la primer vegada na que Carlos Alba 'Cellero' va compartir escenariu co so fíu, Martín Peña, de 10 años. Va ser col cuentacuentos 'Contábenmelo en casa', un homenaxe a la tresmisión horal, mañana a les 19 hores nel salón d'actos del Centru de Cultura Antiguu Institutu.

A la mesma hora y nel mesmu llugar van ponese n'escena les obres ‘De qué color ye’l sol’ (Compañía Kamante Teatro) y ‘La neña de les trences al revés’ (El Callejón del Gato), el xueves y el vienres, de manera respeutiva. Mentes, el sábadu, 'Escenines pa la Reciella' va treslladase al Colexu Públicu Xovellanos, onde a les 12 hores va celebrase'l conciertu de presentación del esperáu ‘Bestiariu 3’, discu producíu por La Fabriquina y editáu por Araz.

Les cuatro actividaes son de baldre, hasta completar aforu.