El tope salarial del Sporting aumenta hasta los 9,75 millones

Ye'l novenu más altu de Segunda División.

LaLiga Impulso, l'alcuerdu col fondu d’inversión británicu CVC, permite al Sporting aumentar el tope salarial de 5,35 millones d'euros hasta los 9,75. Ésta ye la cantidá máxima que'l club roxiblancu pue dedicar a plantiya y cuerpu téunicu del primer equipu, amás del gastu na cantera, anque nun ta obligáu a llegar a esa cantidá, cola opción de destinar una cifra menor.

La desigualdá con respeuto a los equipos que baxen de Primera caltiénse, sumándose agora'l repartu de LaLigaImpulso que permite a entidaes como'l Málaga CF pasar de 4,90 millones a 12,49, el quintu máximu tope. La cantidá más alta tienla l'Eibar (30,16 millones), siguíu del Valladolid (29,03), Leganés (26,44) y SD Huesca (18,67), col Sporting –tamién beneficiáu en menor midida pol alcuerdu con CVC– nel novenu puestu, con 9,75 millones, y l'Uviéu nel décimu, con 9,60.

Na semeya, Pedro Díaz conduz el balón na victoria del domingu del Sporting col Málaga por 2-1.