El Sporting merca la finca La Marruca pa potenciar Mareo y la cantera

147.540 metros cuadraos que sumar a los 112.000 que conformen la Escuela de Fútbol de Mareo pa crear unes instalaciones deportives de primer nivel. Ye’l pasu qu’esti xueves dio’l Sporting al mercar la finca La Marruca, práuticamente pegada a la ciudá deportiva roxiblanca, coles perres de los fondos CVC de 'LaLiga Impulso'.

D’esta forma el club, que fixo güei l'anuncia, consolida la so apuesta por Mareo y la cantera, salvavides de la entidá nes décades últimes. A les instalaciones actuales en Leorio, municipales llueu de la venta al Conceyu nel 2001 pa evitar la disolución de la sociedá anónima, incopora agora esta finca entá mayor que l’actual, na qu’ha de conservar la casería, protexida.

La Marruca ta asitiada en Roces y, al nun tar coneutada con Mareo, el club firmó otru alcuerdo d’alquisición sobre una parte de la parcela catastral 148 (en concreto, 10.000 metros cuadraos) pa qu’haya una circulación direuta ente los dos terrenos. El Sporting nun dio cifres de la operación, pero podría tar en cuasi 2 millones d’euros.

Na ampliación de Mareo va proyeutase un espaciu pal primer equipu y la deseada residencia, amás d’un edificiu d’usos múltiples, un polideportivu y más campos de xuegu. La operación ye posible gracies al alcuerdu colos fondos CVC nomáu ‘LaLiga Impulso’, del que va recibir dalgo más de 20 millones d’euros, cantidá qu’ha destinase en polo menos un 70 por cientu a inversiones n’infraestructura, desarrollu internacional, desendolcu de marca y productu, incorporación de talentu, estratexa de comunicación, plan d’innovación y teunoloxía, y plan de desarrollu de conteníos en plataformes dixitales y redes sociales.

Na semeya, La Marruca, colos campos de Mareo abaxo, na esquina derecha, y el cachu de terrén que separta dambes finques.Semeya propiedá del Real Sporting de Gijón, S.A.D.