El Sporting iguala la so peor clasificación histórica: el 13 en Segunda División

En lligues de 22 equipos ocupó'l mesmu puestu na temporada 2006-2007, la primera de Preciado, cuando firmó 2 puntos más.

Con polémica finó la Lliga más llarga, de 11 meses de llargor por cuenta la pandemia de COVID-19 qu'obligó a parar la competición 3 meses, dao'l positivu de xugadores del Fuenlabrada que llevó a la LaLiga a aplazar el so partíu col Deportivo. Una situación intrascendente pal Sporting, que nun se xugaba nada al perder el vienres n'Almendralejo, na penúltima xornada, cualquier opción remota de clasificar pa les eliminatories pol ascensu.

Los roxiblancos sumaron el so cuartu fracasu siguíu, el terceru firmáu por Miguel Montes Torrecilla, nuna temporada que José Alberto nun entamó bien y que Djukic nun pudo enderezar pola falta esmoleciente de gol del equipu. El resultáu ye la peor clasificación histórica del club, un decimotercer puestu con 54 puntos, posición que se dio na 2006-2007 (56 puntos) y tamién na 1960-1961 y na 1961-1962, cuando la Segunda tenía dos grupos de 16 equipos, salvando la categoría nes dos ocasiones pola renuncia del Condal de Barcelona y les trés cruces d'Ortiz, y el descensu de la Real Sociedad qu'arrastró al so filial a Tercera, lo qu'evitaba xugar la promoción a los xixoneses.

Djukic nun sigue y Albert, tampoco

El Sporting confirmó esta mañana que Djukic, que tenía renovación automática nel casu de clasificar al equipu, nun va siguir la temporada próxima al frente del equipu, campaña na que nun van tar los ascendíos a Primera Huesca y Cádiz, y los descendíos Real Racing Club, l'Extremadura UD, el Deportivo y el Numancia. Mentes, llegun dende Primera l'Espanol, el Mallorca y el Leganés, y de Segunda B, a falta de conocer dos places, l'UD Logroñés y el Cartagena.

Pa ocupar el bancu d'El Molinón gana enteros David Gallego, entrenador que la pasada campaña dirixó al Espanyol en Primera. Vendría col so equipu téunicu, a esceición del preparador de porteros, polo que'l mui valoráu pola plantía Fran Albert nun siguiría como preparador físicu.