El Sporting esta vegada sí se presentó al derbi

El Molinón vivió esti domingu una fiesta tres la victoria del Sporting nel derbi por 1-0 al Uviéu gracies a un tantu en propia puerta de Christian Fernández. A diferencia del partíu del Tartiere, que provocó la destitución de Baraja al cayer por 2-1, los de José Alberto compitieron dende'l primer minutu hasta'l final y sumaron el so cuartu trunfu siguíu a les puertes del tramu decisivu.

La victoria roxiblanca tuvo marcada por una xugada polémica nel tramu final del partíu. Nel minutu 89, l'árbitru Isidro Díaz de Mera Escuderos, mui protestáu pol connxuntu azul, anulaba a Ibra un gol por falta posible del delanteru a Peybernes.

Una falta sacada en campu propiu pol Uviéu, que toca de cabeza Carlos Hernández hacia l’área, onde’l xugador senegalés trata d’enganchar el balón de primeres cruciándose'l central francés. Ibra golpia a Peybernes, que va al suelu, quedando’l balón francu pa un segundu intentu de remate qu’acaba en gol.

El colexáu, bien posicionáu, interpretó falta del delanteru na xugada, polo que procedió a anular el gol, énte les protestes de xugadores y bancu visitante. Darréu prolongó 5 minutos el partíu, que morrió ensin más peligru pa la meta de Mariño.

Salió’l Sporting nesta ocasión cola intensidá que nun tuvo na ida nel Tartiere, cediendo la pelota al Uviéu y disputando tolos balones dividíos. Saúl Berjón, el meyor argumentu de los azules, tuvo bien vixiláu polos roxiblancos, con Geraldes enriba del uvieín cada vegada que recibía na so banda, munches vegaes rozando la cartulina mariella.

Sicasí, el peligru siempre vieno de les files roxiblanques. Asina llegó’l gol nel minutu 31, cuando Carlos Hernández alloñó la pelota nun ataque llocal, adelantándose Molinero a Bárcenas y recoyéndola Nacho Méndez, que filtró un pase a Djurdjevic pa ganar el serbiu la llinia de fondu y buscar a Álex Alegría en boca de gol, tocando l’asistencia Christian Fernández cola mala suerte d’introducir el balón na so propia portería.

Penalti falláu

El gol dio confianza al Sporting y obligó al Uviéu a dar un pasu alantre, anque ensin ocasiones de peligru. La situación llevó a Anquela a mover el bancu pronto, nel 62, introduciendo a Diegui y a Ibra por Bárcenas y un desafortunáu Joselu, de manera respeutiva, cola intención de ganar más profundidá y opciones de remate.

Djurdjevic, que lluchó por tolos balones calteniendo una batalla constante con Carlos Hernández, tendría la oportunidá de sentenciar el partíu dende los once metros. Sicasí, el serbiu fallaría la pena máxima señalada por un manotazu de Christian Fernández a Alegría al adivinar Champagne la so intención.

Esta aición, xunida a la entrada de Toché, tornó’l partíu del llau azul. El Sporting comenzó a pensar en defendese, aprovechando bien los d’Anquela los centímetros de los dos delanteros.

Asina, llegaría la ocasión más clara pa los visitantes, un minutu enantes de la xugada polémica del partíu. Ibra cedía de cabeza a Toché, que solu nel área pequeña remataba tamién de cabeza, ensin pode-y dar la fuercia necesaria pa poner n’aprietos a Mariño.

12 de 12

Cola victoria nel derbi, el Sporting suma cuatro trunfos siguíos. Los de José Alberto ganaron al Numancia, Almería, Córdoba y Uviéu, lo que-yos permite recortar distancia cola sesta plaza, oxetivu más real que tien anguaño al algame’l club xixonés.

Nestos momentos, a falta del partíu que zarra la xornada esta nueche, el Mallorca-Zaragoza (21 hores, GOL), el Sporting ta a cuatro puntos del últimu puestu que da accesu a les eliminatories pol ascensu. Ésti ocúpalu’l Cádiz con 49 puntos, anque los baleares sumen 48 y de ganar a los aragoneses caltendría en seis puntos la distancia col play-off.