El Sporting consolida’l so lideratu con una victoria sufrida en Valladolid

Un gol de Rubén García nel minutu 3 del partíu sirvió pa que’l Sporting consiguiera los trés puntos frente al Valladolid nun José Zorrilla mancháu de roxiblancu polos más de 4.000 siguidores desplazaos. Esti trunfu permite al Sporting consolidase nel lideratu de Segunda.

Nun resultó fácil. El Valladolid, con inquilín nuevu nel bancu, l’ex futbolista del Deportivo y seleccionador catalán absolutu Sergio González, apretó a los xixoneses hasta’l final, con dos ocasiones clares nos minutos últimos salvaos primero por Mariño y, depúes, por Barba baxo palos.

Tamién tuvo opciones el Sporting a la contra, ensin aciertu, equipu que supo sufrir y caltener la ventaya nel marcador per 90 minutos gracies a un tantu que llegó tres un pase en llargu de Barba hacia Nano Mesa, que ganó llinia de fondu y punso un centru fuerte y rasu que remató Rubén García en boca de gol. Un tantu tempraneru que volvió lloca a la Mareona desplazada a Valladolid.

Meyor racha histórica

El trunfu de Valladolid valió tamién pa igualar les dos meyores raches históriques de trunfos consecutivos del club, asitiaes en 8 victories. Éstes diéronse nes temporaes 1950-1951 y 1956-1957, dambes en Segunda División.

El domingu (18 hores, Ramón de Carranza) los de Baraja tienen la posibilidá de batir esti récor nel casu de superar al Cádiz, quintu clasificáu a siete puntos del Sporting. Na ida los gaditanos pasaron perriba de los roxiblancos, ganando por 0-3, pero anguaño tán viviendo un bache de resultaos y vienen de perder en Reus por 1-0.