El Proyeutu Impulsa sofita la busca de financiación a diez proyeutos

La iniciativa lleva'l nome de #ImpulsaCrowdfunding. Dos de los proyeutos yá llograron les perres que necesitaben.

Esta tarde a partir de les 19 hores nel Muséu del Ferrocarril van presentase los diez proyeutos esbillaos pa participar na iniciativa de crowdfunding a traviés de la plataforma Verkami. Esta iniciativa ta entamada pol conceyu xixones al traviés del so Proyeutu Impulsa.

La campaña de cuestación popular na rede entamó’l pasáu día 7 y dos de les iniciatives presentaes yá algamaron la financiación requerida. El plazu pa sofitales fina’l día 17 d’avientu.

Hasta güei yá cuenta con más de 500 ‘mecenes’ y 13.000 euros de recaudación. Amás, dende Impulsa cofinanciarán con hasta 2.000 euros les iniciatives avalaes pola ciudadanía.

Ún de los proyeutos que participen nesta inicativa ye ARTE-Yazmina Reza, que pretende facer una versión en llingua asturiana y adaptada a Asturies d'esta obra pernomada del teatru contemporáneu. A esta campaña presentáronse un total de 33 iniciatives, de les que s’escoyeron diez que foron guiaos nel so llanzamientu na plataforma de crowdfunding.