El popular Pañeda camuda’l nome del programa xixonés ‘Préstanos facer deporte’ pa desaniciar l’asturianu

El programa ‘Préstanos facer deporte’, que se vien celebrando en Xixón dende’l 2010, camuda’l nome pa desaniciar l’asturianu por decisión del popular Jorge Pañeda. El PSOE denuncia la situación y Iniciativa pol Asturianu critica la escusa puesta pol conceyal.

D’esta forma, la ufierta municipal d’actividaes deportives nes diferentes sableres del conceyu pasa a llamase ‘Nos gusta hacer deporte’. Na Xunta Rectora del Patronatu Deportivu Municipal del martes pasáu “l’equipu de la alcaldesa, col conceyal del ramu Jorge Pañeda al frente, xustificó a entrugues del PSOE xixonés el motivu d’esta decisión de la siguiente forma: “no confundir a las niñas y los niños con los idiomas””, espliquen los socialistes.

“Ye un atropellu a la promoción del asturianu. Mostramos abiertamente la nuesa quexa y defendemos ensin dulda l’usu d’una espresión asturiana como ésta” declaró l’edil Jacobo López Fernández. El PSOE alerta que “na so defensa, el gobiernu llocal foi a asegurar que yera la primera vez qu’otro programa, el de ‘Vacaciones Deportivas’, incluyía los bolos asturianos y la petanca”.

“La petanca nun ye un deporte tradicional asturianu, ye d’orixe francés. VOX yá nun ta nel gobiernu, pero les idees de la ultraderecha siguen presentes con Foro, PP y el tránsfuga y esa obsesión por facer desapaecer cualesquier rastru que nos lleve a la llingua y a la cultura asturiana”, criticó López Fernández.

Incumplimientu del Plan de Normalización

Iniciativa pol Asturianu “llamenta la persecución al idioma entamada pol Patronatu Deportivu Municipal de Xixón al suprimir la presencia de la llingua asturiana nel programa d’actividaes ‘Préstanos facer deporte’”. Esti coleutivu “ve inxustificable la decisión y considera que los argumentos apurríos pol conceyal de Deportes, Jorge Pañeda, por una supuesta confusión ente’l significáu n’asturianu y en castellán del verbu prestar, nun son más qu’escuses”.

Recuerda qu’esta decisión “incumple la ordenanza municipal d’usu del asturianu y contravién l’espíritu del Plan de Normalización del Conceyu pal periodu 2024-2027 aprobáu por unanimidá nel Conseyu Asesor de la Llingua Asturiana de Xixón y que va ser ratificáu bien llueu en Plenu”, y convida a Pañeda al grupu municipal popular “a reflexonar sobre esti pasu atrás na presencia normal del asturianu nesta campaña”.

“Nun ye de recibu presumir tolos díes de l’aprobación de la Llei d’Usu y, al mesmu tiempu, xenerar estos conflictos onde l’idioma sal perdiendo”, demanden al tiempu que rescamplen que la presencia del asturianu nesti programa d’actividaes que llevaba varios años vixente nunca xenerara “nengún tipu de conflictu nin confusión como argumenta la conceyalía”.

Pa finar, l’asociación considera qu’esti cambiu nel nome ye especialmente grave al tratase d’una campaña orientada a la mocedá. “La presencia habitual, con normalidá y en diferentes campañes informatives, especialmente orientaes al públicu xoven, ye fundamental pa normalizar, visibilizar, recuperar falantes y garantizar la tresmisión xeneracional del idioma”, asegura.

Na imaxe, cartelu de la última edición del programa 'Préstanos facer deporte'.