El Molinón y el pabellón de Perchera-La Braña sustitúin al Palaciu como centru de vacunación

La obra pa iguar la cubierta del Palaciu obligó a treslladar el centru de vacunación contra la COVID-19 a otros dos puntos de la villa. Si la selmana pasada entamó l’alministración nel pabellón de Perchera-La Braña, el llunes fíxolo n’El Molinón, con tola infraestructura instalada baxo la grada del fondu norte.

La necesaria actuación nel Palaciu p’acabar coles goteres que tantos problemes traen a los equipos qu’entrenen y compiten nel llugar, xunto con otres intervenciones previstes, obligaron a buscar allugamientos nuevos pa siguir cola vacunación de la ciudadanía de Xixón, agora centráu nel grupu d’edá de 40 a 49 años no que se refier a la primer dosis. Dos foron los llugares escoyíos, el pabellón de Perchera-La Braña y El Molinón, pa cubrir asina dos zones del conceyu.

La selmana pasada yá entamó la vacunación na pista cubierta, dirixida a persones de 50 a 59 años, que recibieron Janssen. N’El Molinón fíxolo ayeri cola llamada de 1.200 persones de los años 1972 y 1973, anque la intención ye algamar les 3.000 puestes diaries.

Les persones citaes han entrar pela puerta 4, onde han dar los sos datos. La salida faise pela 6 depués d’esperar sentaes 10 minutos por si hubiera dalguna reaición al preparáu.

Na imaxe, un xixonés cola mázcara colos colores del Sporting recibe la vacuna ayeri n'El Molinón. Semeya de la Conseyería de Salú.