El Mercadín abre la XX Fiesta de la Sidra Natural

Esti añu tampoco nun va haber récor mundial d'escanciáu nin preba na Plaza Mayor.

La XX Fiesta de la Sidra Natural va siguir la mesma idea que la del añu pasáu, lloñe entovía d'aquellos multitudinarios eventos qu'acompañaben esta celebración al rodiu de la nuesa bébora nacional. Va entamar mañana cola apertura del Mercadín de la Sidra y la Mazana nos Xardinos de la Reina, plaza'l Marqués y Plaza Mayor.

23 casetes van vender toi tipu de productos rellativos a la bebida y al frutu, ente ellos ún nel que poder mercar los vasos oficiales d'esta edición. L'horariu del mercáu va ser 11 a 23 hores, sacante'l día últimu, el domingu 29, nel que va pesllar a les 22 hores.

Nel Xardín Botánicu Atlánticu

El restu d'actividaes d'esta celebración van treslladase otra vegada al Xardín Botánicu Atlánticu y van ser a puerta zarrada, con accesu posible namái a participantes. Asina'l xueves, a les 17.30 hores, va celebrase'l XXVIII Campeonatu Oficial d'Escanciadores, puntuable pal Campeonatu d'Asturies.

Yá'l domingu 29, día grande de la Fiesta de la Sidra Natural, va escoyese y entragase l'Eloxu d'Oru al meyor palu de los llagares participantes. El primer corte va ser el xueves al meudía, mentes que'l segundu va ser el mesmu domingu a la mesma hora.