“El cumplimientu del Plan de Normalización y la visibilización del asturianu en Xixón nun pue escaecer la publicidá institucional", señala Mario Suárez del Fueyo

Na Xunta Rectora de la Fundación Municipal de Cultura (FMC) presentáronse los pliegos pa la contratación de la publicidá de les actividaes, programes y servicios de la FMC y la Universidá Popular. El pliegu foi aprobáu por mayoría, anque Xixón Sí Puede (XsP) condicionó'l so votu positivu a que l'asturianu tea presente nos materiales resultantes como requisitu p'alxudicar esos llabores.

Concretamente, el grupu municipal caltién que pa la contratación del suministru de exemplares del Anuariu del Teatru d'Asturies tien de pedise que la so edición sía n'asturianu y en castellanu. Amás, la publicidá y el programa de la Feria Europea d'Artes Escéniques pa Neños y Neñes (Fetén 2018) y el Festval de Danza han de ser billingües. Un billingüismu que tamién tien de tar nes inserciones publicitaries en medios y revistes especializaes.

El mesmu criteriu del bililngüismu ha d'aplicase, tal como indicó XsP na Xunta Rectora de la FMC, pa la contratación del serviciu de publicidá de les actividaes, programes y servicios de la FMC y la Universidá Popular. Nesti sen, amás de que l'asturianu tea presente na publicidá pa les alxudicaciones, el grupu municipal demandó que nel plan de publicidá s'incluya a los medios asturianos dixitales.

“El cumplimientu del Plan de Normalización y la visibilización del asturianu en Xixón nun pue escaecer la publicidá institucional: son recursos públicos muy afayadizos pa facer efectivos parte de los compromisos del Conceyu pa cola llingua y la cultura asturiana, polo qu'ha de garantizase qu'estes inversiones tengan la doble rentabilidá d'esparder la información y de visibilizar el nuestru patrimoniu inmaterial”, señala Mario Suárez del Fueyo, portavoz de XsP.