El CSI últimu del Gijón Horse Jumping anúlase tres la detección de 8 positivos de COVID-19

El primer afeutáu foi un xinete madrilanu que participó nes pruebes hípiques del CHAS celebraes del 14 al 16 d'agostu.

Un aconceyamientu d'urxencia ente'l Patronatu Deportivu Municipal, el club hípicu y la Federación cola Conseyería de Salú llevó a ésta última a tomar la decisión d'anular la última de les pruebes programaes del Gijón Horse Jumping, un Concursu de Saltos Internacional (CSI), que diba empezar el xueves y allargase hasta'l domingu. D'esta forma pretende garantizar la seguridá de deportistes y públicu asistente, recomendando la non celebración de cualesquier tipu de competición con xente de fuera del país nel conceyu.

Foi precisamente ún de los participantes nel Estatal de 4 estrelles del 14 al 16, un mozu de Madrid, el primeru que dio positivu una vegada de vuelta al so llar. Tres facer pruebes PCR a los sos contautos estrechos mientres la so estancia en Xixón, otres 7 persones tienen COVID-19, nengún d'ellos asturianu.

Según informó'l conceyal d'Actividá Física y Deporte, José Ramón Tuero, los contaxos produxéronse en fiestes nocherniegues ayenes a la prueba hípica, que se ve perxudicada. "Foi un actu d'irresponsabilidá por parte d'un mozu", aseguró.

Na semeya, nel centru, Tuero.