El color del Antroxu torna a les cais de Xixón

Depués d’un añu d’ausencia poles restricciones, los mazcaritos tornaron a dar color a les cais de Xixón. El conceyu celebra l’Antroxu y les charangues y les carroces van desfilar esti Llunes d’Antroxu, día nel que la folixa s’allarga hasta bien entrada la madrugada.

La fiesta encara los sos díes grandes depués d’una fin de selmana orientada a la reciella y les charangues, con epicentru en Begoña y nel Teatru Xovellanos, que tornó a escosar toles entraes pa la trentena cuarta edición del concursu. Con toles midíes de seguranza pola COVID-19, recupérase güei’l desfile, que va salir a les 19 hores d’El Bibio pa percorrer tola carretera la Costa hasta L’Humedal.

Los mazcaritos van allargar la folixa pela nueche enantes d’afrontar la ‘triste’ xornada de mañana, cola muerte de la sardina d’esti Antroxu, Sardi, que l’añu pasáu pasara la fiesta confinada y que nesti tiempu con nós ganara la simpatía de tolos xixoneses l’añu. El veloriu va instalase a les 17 hores en Begoña, organizaú por Escenapache, el cortexu va iniciase a les 19.15 hores y l’entierru a les 20.15, con Higiénico Papel Teatro, na plaza’l Marqués, onde va lleese’l testamentu del pexe.

Enantes, a les 18 hores, van entregase los premios de los diferentes concursos entamaos estos díes, esto ye, l’infantil, el de charangues y el de carroces.

Restoranes ensin meses llibres

Esta xornada, Martes d’Antroxu, festividá llocal, va enllenar tamién los restorantes de Xixón, qu’ufren menús d’Antroxu. Munchos yá nun cuenten con meses llibres p’atender a los veceros que quieren xintar fuera de casa pote, picadiellu, frixuelos y picatostes.