El Botánicu, el Pueblu d’Asturies, Veranes y la Campa Torres son les primeres instalaciones n’abrir les sos puertes

Poco a poco va tornando la normalidá, entovía con restricciones d'aforu, en Xixón. El sábadu’l Xardín Botánicu Atlánticu reabrió les sos puertes y esti martes sumáronse el Muséu del Pueblu d’Asturies, Veranes y la Campa Torres, mentes que’l restu d’instalaciones museístiques municipales esperen fecha pa recibir visitantes.

Con llende d’aforu y con obligáu complimientu de les midíes de seguranza retomó la so actividá’l sábadu’l Botánicu. L’horariu pa visitar esti llugar únicu del conceyu ye dende ayeri’l de branu, esto ye, de 10 a 21 hores, anque pel momentu en dos franxes horaries: de 10 a 15.30 y de 16 a 21 horas.

Güei sumáronse al Botánicu’l Muséu del Pueblu d’Asturies (de 10 a 19 hores, de martes a vienres; y de 10.30 a 19 hores, sábados y domingos), el Muséu de la Villa Romana de Veranes (de 10 a 15 hores hasta’l 15 de xunu) y el Parque Arqueolóxicu-Natural de la Campa Torres (de 10.30 a 19 hores). Mentes, el Muséu de les Termes Romanes de Campu Valdés, el Muséu Casa Natal de Xovellanos, el Muséu Nicanor Piñole, el Muséu del Ferrocarril d’Asturies, el Muséu de la Ciudadela de Celestino Solar y les sales d’esposiciones del Centru de Cultura Antiguu Institutu reabrirán a lo llargo d’esti mes y xunetu.

Na imaxe, dos visitantes al Botánicu tres la so reapertura. Semeya propiedá del Xardín Botánicu Atlánticu.