Djurdjevic confirma que va tar disponible pal Sporting nuna hipotética eliminatoria pol ascensu

"Nun voi dir cola seleición porque son dos partíos amitosos", aseguró'l delanteru serbiu, que va defender la camiseta de Montenegru, país d'orixe del so padre, con mires a Qatar.

La llamada de Miodrag Radulovic, el nuevu seleicionador montenegrín, y la decisión d'Uros Djurdjevic d'aceptar el retu, refugando asina una posible convocatoria de Serbia na temporada na que ta llamando más l'atención gracies a los 19 tantos que lu convierten nel máximu goliador de la Segunda División, va dexar al Sporting ensin el so referente n'ataque per dos partíos, que se suma a la de Manu García, convocáu pola sub-21: el del Alcorcón n'El Molinón (viernes 26, 19 hores) y la salida col Rayo Vallecano (martes 30, 21.30 hores). El '23' roxiblanco va xugar neses feches los primeros partíos clasificatorios pal Mundial de Qatar, en Riga contra Letonia (miércoles 24, 20.45 hores); y en Podgorica frente a Xibraltar (sábadu 27, 15 hores) y Noruega (martes 30, 20.45 hores).

Nun habrás más partíos oficiales pa Montenegru hasta setiembre, polo que les convocatories próximes coincidiríen coles eliminatories pol ascensu a Primera División que xugaría'l club xixonés nel casu de caltener l'actual quintu puestu nun tendríen trescendencia. "Pa xunu yo voi tar col Sporting seguro. Nun voi dir cola seleición porque son dos partíos amitosos", confirmó Djuka.

El delanteru recibió esta mañana'l premiu 'Jugador Cinco Estrellas' correspondiente a febreru qu'entrega Mahou como meyor futbolista roxiblancu d'esti mes depués d'una votación al traviés de la cuenta de Twitter de la cervecera. En xineru yá llevara esti mesmu gallardón.