Cúmplense 25 años del primer ascensu a l'ACB del Gijón Baloncesto

El Trébol consiguió dar el saltu dende EBA nuna fase final en casa tres dellos intentos previos dende la desapaecía Primera División.

Nel primer añu nel que la Federación Española de Baloncesto (FEB) modificó’l modelu de baloncestu estatal pa crear una categoría de 52 baxo l’ACB na qu’ascendíen 2 equipos, con un entrenador estauxunidense debutante como Bill McCammon y una plantía liderada por John McDowell –había un máximu d’un estranxeru por equipu– y Juan Antonio ‘Vallecas’ Hernández, el Gijón Baloncesto fixo historia. Nuna competición eterna, con fase de grupos y otra d’ascensu, clasificó a la final a ocho que’l club fundáu nel 1982 consiguía organizar na ciudá.

El principal favoritu, el tamién desapaecíu Tenerife-Canarias de Ray Smith, sería’l primer rival nuna eliminatoria que sería clave. Nun comenzaron bien los de Xixón énte les 7.000 persones presentes nun Palaciu con capacidá pa 5.000, con xente de pie y ocupando los pasiellos, con desventayes de más de 20 puntos na primer metá, pero too camudó tres el descansu con Vallecas Hernández xubiéndose l’equipu al llombu –33 puntos anotaos nel partíu– pa liderar la remontada hasta’l definitivu 77-72.

Al día siguiente, 3 de xunu, l’ambiente nel Palacio tornaba a ser espectacular tres lo vivío en cuartos. Una victoria énte l’Ernesto Electrodomésticos Alicante, dirixíu pol que sería depués téunicu xixonés Luis Casimiro Palomo, daba a Asturies per primer vegada una plaza n’ACB.

Magar que’l rival nun tenía la entidá del Tenerife, el partíu nun foi fácil, y solucionóse con un axustáu 69-68 que nun tuvo faltu de polémica nel tramu final del partíu. La llocura españaba nel Palaciu y el glayíu ‘Trébol ACB’ sonó más fuerte que nunca.

Na final, los xixoneses nun pudieron llevar el títulu, que viaxó a Las Palmas de la mano del Club Baloncesto Gran Canaria, actual Herbalife, tres ganar 84-86.

Cuatro años na máxima categoría

Tres la celebración llegó la llucha nos despachos del presidente Tino Grana pa consiguir les perres del canon de l’ACB. En munchos momentos paecía que nun se diba algamar, pero finalmente pagáronse los más de 400 millones de pesetes –al rodiu 2,5 millones d’euros– qu’hipotecaríen el futuru del club al igual que’l de tantos otros.

L’añu del debú foi una allegría pal baloncestu asturianu, cola primera gran entrada contra’l Joventut, la visita de la hinchada del Taugrés o la victoria al Real Madrid d’Obradovic por 76-74 nel Día de Reis. Finalmente llegaría’l descensu naque’l llucháu play-off col Xacobeo’99 Ourense (1-3) de Darell Lockhart, clave nuna cruel eliminatoria en Xixón.

El Gijón Baloncesto tardaría 3 años en tornar a l’ACB, de la mano de Moncho López nel bancu y d’un imberbe Luis Scola y el veteranu Linton Townes na cancha. Llegaría la meyor época del club, con 3 años siguíos na categoría máxima y el pasu de xugadores del nivel de Lou Roe, ente otros.

Finalmente, el pesu del creitu del canon y l’esfuerciu de competir n’ACB ensin patrocinador, xunío al descensu a LEB Plata, llevó al Gijón Baloncesto a la desapaición nel 2009. Quedaba güerfanu’l deporte de la canasta na ciudá, con proyeutos estos años como’l del Gijón Basket, anguaño n’EBA, o’l Círculo Gijón Baloncesto y Conocimiento, en LEB Plata, como intentos pa tratar de cubrir un güecu insustituyible nel corazón de munchos aficionaos.