“Cuando la to familia te necesita tienes que tar ehí”, asegura Abelardo

|
Javi Rico y Abelardo

Col Sporting col agua al pescuezu, Abelardo respondió a la llamada desesperada del club y va tomar el mandu del equipu nes cuatro finales que queden pal final de Lliga y tamién pa la temporada qu’entra. “Cuando la to familia te necesita, y el Sporting yelo, tienes que tar ehí”, espresó’l xixonés, que sustitúi a José Luis Martí nel bancu roxiblancu.

“Te lo voy a decir en asturiano: trabayu, trabayu y trabayu”, respondió na presentación d’esta mañana n’El Molinón a una entruga sobre qué ye lo que fai falta pa salvar la campaña, si una o dos victories. “La situación ye la que ye, toi convencíu de cumplir l’oxetivu y tar munchu tiempu trabayando nel club”, aseguró’l téunicu, que dexó nidio que garrar agora l’equipu “nun ye ser valiente, ye ser sportinguista”.

Confesó l’ex central que’l Sporting yá s’interesó pola so situación hai 10 xornaes, enantes del fichaxe de José Luis Martí, pero’l contratu como comentarista que tenía firmáu hasta mayu con Movistar llevólu a nun aceptar la ufierta nesi momentu. “Agora yera más fácil”, señaló al tiempu que confesó que tamién refugara ofrecimientos d’otros equipos.

Con Tomás como segundu y la incorporación de Borja de Matías, col que coincidió nel Alavés, como téunicu asistente, Abelardo afronta estes cuatro xornaes nes que pretende que “la xente del Sporting se sienta arguyosa, que l’equipu sía competitivu. Que si un xugador pierde un balón depués baxe, perdón pola espresión, a toa hostia; qu’intentemos ser verticales y llegar a zona de remate; que cada disputa pa nós sía una Champions… Eso ye lo que la xente quier ver en Xixón y que quiero tresmitir a los futbolistes”.

Abelardo va dirixir el so primer entrenamientu esta tarde, a les 17 hores, nel campu númberu 1 de Mareo, con accesu llibre pa los aficionaos. Va ser mañana cuando entame a preparar a nivel táuticu’l partíu del sábadu con un Huesca “al que nun vi demasiao. Güei tócame dormir poco pa preparalu”.

Sustitutu pa Calleja

Tuvo acompañáu na presentación el téunicu por Javi Rico, direutor deportivu, qu’enantes de nada quixo agradecer a Martí “tol so trabayu, dedicación y tiempu”, deseando-y tolo meyor nel futuru. El balear sumó 1 victoria, 3 empates y 6 derrotes nos 10 partíos nos que tuvo al frente del Sporting, agora decimoséptimu clasificáu a 4 puntos del descensu con 12 en xuegu.

Sobre la salida del secretariu téunicu Noé Calleja, que llegó al club de la so mano, remitióse al curtiu comunicáu asoleyáu pola entidá, y confirmó que ta buscando-y sustitutu.

Na imaxe, Rico y Abelardo.

Contador Estadistiques