‘Atéchate col asturianu’, el proyeutu normalizador del Fernández Vallín que ganó’l Fierro Botas

Escolines y escolinos de Llingua Asturiana y Lliteratura de primeru y segundu de Bachilleratu y cuartu de la ESO del IES Fernández Vallín ganaron el VI Premiu Fierro Botas a la Meyor Idea Normalizadora. Foi’l col proyeutu ‘Atéchate col asturianu’, dos llinies de paragües pa grandes y pequeños coles pallabres como protagonistes principales.

“La idea yera que se pudiera facer y que l’asturianu tuviera presente”, recordaba dende l’escenariu a les sos alumnes y alumnos Marián García Rodríguez, profesora que s’encargó de coordinar la iniciativa. “Ye una idea cenciella, que sí llevó tiempu facer”, pero un llabor qu’enganchó a los 16 estudiantes que conformaron el grupu y que sirvió pa que trabayaran vocabulariu en clase.

De nome ‘Atéchate col asturianu’, busca “esparder l’asturianu per aciu de paragües”, esplicó darréu a YeXixón la maestra, pa lo que se crearon “dos llinies de paragües, una pa nenos que se llama ‘Orbayando pallabres’ y otra pa mayores, que sería ‘Lloviendo pallabres’”, un total de “12 paragües con cuatro colores, según les estaciones, que caún lleva ente diez y ocho pallabres que tienen que ver con temátiques que fuimos trabayando en clase: personaxes de la mitoloxía, verbos, xuguetes…”. Voces “que buscamos que nun foran mui enguedeyaes, non por nada, sinón por facer que foren pallabres que te prestara tener nel to paragües”, añadió.

Una cuestión que terminó de convencer al xuráu frente a otros foi que’l proyeutu del Fernández Vallín plantega ónde se pue desenvolver esta campaña normalizadora, amás de tar mui bien estructuráu. Asina, propunxeron que se pudieren dar na Feria Internacional de Muestres d’Asturies (FIDMA) o na Oficina de Turismu, y que s’emplegaren pa promocionar la llectura nes biblioteques o como decoración en llocales, ente otres coses.

De premiu, una pizarra dixital

Los 16 estudiantes recibieron nun actu celebráu ayeri nel Centru de Cultura Antiguu Institutu de manes de la so profesora y del direutor de la Fundación Municipal de Cultura, Educación y Universidá Popular, Miguel Barrero, y de la responsable de la Oficina de Normalización Llingüística, María Xosé Rodríguez López, un diploma conmemorativu y una fardela d’un proyeutu ganador del Fierro Botas que’l Conceyu fixo realidá. El premiu d’esta iniciativa destinada a tolos institutos del país “col envís de favorecer el protagonismu activu del alumnáu y la so reflexón y ya implicación nel procesu de normalización llingüística”, amás de recordar la figura de Federico González-Fierro Botas, yera una pizarra dixital pa l’aula d’asturianu que sirve como recompensa.

Barrero felicitó a los partícipes por “un proyeutu mui prestosu”, y aseguro que ye “tan prestosu que vamos facer por que se pueda convertir en realidá”. Otra manera, aprovechó’l momentu pa confirmar que “la placa que fai alcordanza de Fierro Botas ta a punto d’acabar d’iguase”, un recordatoriu asitiáu nos xardinos que lleven el so nome n’El Natahoyo y recién el Coleutivu Manuel Fernández de Castro, del que foi impulsor y presidente, y Iniciativa pol Asturianu pidieron la so restitución al tar “frañada y en mal estáu de conservación”.

Por último, Rodríguez López rescampló “el trabayu qu’hai detrás d’esti proyeutu, que somos consciente que ye duro y ye muncho”, sobre manera al tener en cuenta “les poques hores” coles que dispón la materia nos institutos.