Ariza y Lena Elipe ganaron el IV ‘Xixón Fala en 3’

La edición nueva del concursu ‘Xixón Fala en 3’ dexó interesantes intervenciones en llingua asturiana sobre temátiques variaes. Na estaya de cultura asturiana ganó Xicu Ariza con ‘La industria cultural y creativa asturiana: una fonte de riqueza por esplotar’ y na de divulgación Lena Elipe por ‘Autores llatines de lliteratura xuvenil na era Trump’.

El salón d’actos del Centru de Cultura Antiguu Institutu acoyó na mañana del sábadu 22 d’abril esti siempre prestosu eventu que busca promover l’usu del idioma nun contestu formal pa cualquier tema. Los concursantes tienen pa ello trés minutos xustos pa facer la intervención, valorando’l xuráu tanto la calidá espositiva y la capacidá de síntesis como la calidá llingüística, la oratoria y la capacidá de comunicación.

Ésti tuvo compuestu por Pablo Xuan Manzano (Academia de la Llingua Asturiana), María Cristina Valdés (Universidá d'Uviéu), Carmen María Calvo (Direición Xeneral de Política Llingüística), el cineasta Pablo Quiroga y, como secretaria, María Xosé Rodríguez López, responsable de la Oficina de Normalización Llingüística de Xixón, organizadora del concursu que reparte 600 euros al ganador de cada estaya. Los segundos y terceros lleven 275 y 125, de manera respeutiva.

Ariza ganó na estaya de cultura y realidá asturiana con ‘La industria cultural y creativa asturiana: una fonte de riqueza por esplotar’. La segunda intervención meyor puntuada foi la de Sergio Buelga, sobre ‘Pili Ibaseta, actriz’, y la tercera la d’Alma Hidalgo, vencedora de la tercer edición na categoría de mocedá, que presentó ‘Real Sporting de Xixón, puru teatru’.

Mentes, na de divulgación xeneral, Elipe convenció al xuráu con ‘Autores llatines de lliteratura xuvenil na era Trump’. Arantxa Margolles, ganadora tamién na cita anterior, anque en cultura asturiana, quedó en segunda posición con ‘Autores llatines de lliteratura xuvenil na era Trump’, y José Manuel Fernández Prado terceru cola esposición ‘Soberanía dixital’.

L’actu completóse con una actuación d’Ún de Grao nos momentos nos que’l xuráu decidía les trés meyores presentaciones de cada estaya.

Na imaxe, Margolles, Buelga, Hidalgo, Ariza y Elipe, con Fernández Prado nun segundu planu, colos sobres cola recompensa y miembros del xuráu. Semeya propiedá de la Oficina de Normalización Llingüística de Xixón.