Álvarez Areces será distinguíu col títulu de Fíu Predileutu de Xixón

Los seis grupos municipales acordaron entrega-y a Vicente Álvarez Areces, de manera póstuma, el títulu de Fíu Predileutu de Xixón, que’l Conceyu nun daba dende’l 2010. La medaya d’oru de la villa, que se va entregar el 29 de xunu, será pal Hospital de Cabueñes.

La propuesta socialista de reconocer al que fora alcalde de Xixón ente 1987 y 2001 fináu’l pasáu 17 de xineru tuvo’l sofitu de tola oposición, inclusive los más críticos cola so xestión, Xixón Sí Puede. Asina s’alcordó ayeri na xunta de voceros, al igual que la concesión de la medaya d’oru al Hospital de Cabueñes coincidiendo col so cincuentenu aniversariu, títulos que s’aprobarán nel Plenu del 13 de marzu.

Hasta esa fecha tolos grupos municipales van facer les sos propuestes pa les medayes de plata de la ciudá, que s’entreguen tolos años coincidiendo con San Pedro, 29 de xunu, fiesta llocal. Enforma especial va ser la conceción del títulu de Fíu Predileutu a Álvarez Areces, distinción que tienen 14 persones –nun s’entregaba dende 2010, cuando la recibió Santiago Carrillo– y que namái caltién en vida Arturo Fernández.