Ad-vientu preséntase nel FICXIXON

La cita ye esti vienres 25 payares a les 22.30 hores na sala 4 de los  Cines Centru de Xixón, con motivu del 54 Festival de Cine de Xixón y compitiendo na estaya del Día d’Asturies II, siendo esti l’únicu curtiu faláu íntegramente en llingua asturiana de la mentada competición.

Ad-vientu ye un Curtiu rodáu pol direutor xixonés Roberto F. Canuto y el cineasta chinu Xu Xaoxi. El rodaxe llocalizóse n'Asturies (Avilés -cascu históricu y campusantu La Carriona- y Carreño -playes y senderos de Perlora y Xivares-).

El curtiu ye un drama psicolóxicu de misteriu que cunta la hestoria de Suso, un mozu ensin trabayu y al debalu, que depués de seguir a una moza daqué peculiar, esta acaba por azotase al mar per un espeñaderu ensin qu'él puea evitalo. Suso andará a la gueta de rempuestes que puen esperta-y alcordances del pasáu ya inclusive lu fagan replantegase la so verdadera identidad.

El direutor asturianu Roberto F. Canuto y el cineasta chinu Xu Xiaoxi, responsables de títulos como la galardonada Sandía Amarga,  Ni Jing: No Robarás o'l llargumetraxe Desire Street, realicen con Ad-vientu'l so primer trabayu n'España.

L'emplegu de la llingua asturiana, xunto a lo poético de la fotografía y la música suxerente, compuesta pol maestru Andrea Centazzo, sirvió pa crear una atmósfera especial. 

Ad-vientu ta protagonizáu por David Soto Giganto, actor perteneciente a la Xoven Compañía Nacional de Teatru Clásicu y graduáu pola ESAD (Escuela Superior d'Arte Dramáticu d'Asturies). Xunto a él atopamos a la prometedora Ici Díaz, a Lidia Méndez, Beatriz Meré (tamién responsable de la producción) o David Blanka.

La compañía china de los direutores,  Almost Red Prod. y les españoles Arkadin Ediciones n'andecha con Producciones Viesqueswood son les responsables de la producción.  

El xixonés Roberto F. Canuto, llicenciáu en Comunicación Audiovisual pola Universidá Complutense de Madrí, con un máster en Direición na New York Film Academy de los Estudios Universal de Hollywood, completó la so trayeutoria en China de la mano de Xu Xiaoxi,  oriundu de Chengdu (Sichuan, China), que'l so camín va dende los sos estudios de Belles Artes en Sudáfrica y el mesmu máster en Los Ánxeles,  onde dambos se conocieron pa xuncir los sos caminos cinematográficos.

Almost Red Productions yá espublizó'l tráiler y el cartelu oficial (diseñáu pola reputada artista sudafricana Su Opperman), xunto a una esbilla de fotogrames del curtiu.  Too ello ta disponible na so web oficial: advientufilm.com y tamién pue accedese anguaño na so páxina oficial de Facebook, facebook.com/advientu.