19 espectáculos y 25 funciones componen el XXIII Danza Xixón

La programación complétase con seminarios, talleres, proyeiciones y alcuentros.

El vienres presentóse na sala 3 del Centru de Cultura Antiguu Institutu la XXIII Muestra d'Artes del Movimientu Danza Xixón, un certame que va tener llugar a lo llargo d'esti mes con "19 espectáculos y 19 compañíes que proceden de distintes comunidaes autónomes", ente les que va haber "dos producciones internacionales de Dinamarca y de México", rescampló Ana Montserrat López Moro, conceyala de Cultura, Mocedá y Museos. Xunto a ello tuvo nel actu Antón García, direutor xeneral d'Aición Cultural y Normalización Llingüística, que, emplegando la llingua asturiana, calificó a Danza Xixón como "un alcuentru mui poderosu del arte en movimientu".

L'escritor confirmó l'interés de la viceconseyería de Cultura, Política Llingüística y Turismu por "por promover, ayudar, a toles artes en xeneral, pero especialmente al mundu de la danza, al que creemos, dende la programación en xeneral, nun se ta faciendo'l casu que merez. Nun ye'l casu del Ayuntamientu de Xixón que, dende l'empiezu del sieglu XXI vien calteniendo esti alcuentru". Nesi sen, señaló que "a midida que los presupuestos nos lo permitan" la intención ye aumentar el sofitu "de manera que la danza se convierta nuna de les referencies escéniques d'Asturies".

Idoia Ruiz de Lara, direutora de Programes de la Fundación Municipal de Cultura, Educación y Universidá Popular, última n'intervenir, apuntó que "la programación de Danza Xixón siempre pretendió dir n'evolución y al llau de lo que les artes del movimientu diben proponiendo". La primer actividá va ser la proyeición, el miércoles a les 19 hores nel Centru Municipal Integráu de La Calzada, de 'Danzad, danzad, malditos', mentes que l'espectáculu inaugural va ser el sábadu, a les 20.30 hores nel Teatru Xovellanos, 'Averno' de los andaluces Marcat Dance.

Na semeya, Izar Gayo, d'Escena Vertiente, que fixo una breve intervención artística enantes de la presentación.