1.200 profesionales participaron nesta edición de FETEN

La edil López Moro valora que'l festival aproxima a neños y mozos "les artes escéniques" y ayuda a convertilos "nos espectadores futuros que los teatros y espacios escénicos necesiten".

La trentena tercera edición de la Feria Internacional d'Artes Escéniques pa Neños, Neñes y Families (FETEN), que se celebró del 25 de febreru al 1 de marzu, tuvo un balance "positivu", según la organización, que dio güei a conocer los datos principales del certame. En primer llugar rescamplen l'aumentu de profesionales, 750 acreditaos, de los que cuasi 400 son entidades programadoras de espacios escénicos y festivales, anque sumando los equipos de les 77 compañíes participantes la cifra algama los 1.200.

Programadores d'Arxentina, Italia, Éire, Tailandiam Portugal, Corea, Alba, Inglaterra, Croacia, Alemaña, Brasil o Colombia tuvieron presentes en Xixón estos díes. "La valoración que nos faen llegar, tanto compañíes como programadores, ye qu'en FETEN lleguen a munchos alcuerdos y piesllen feches pa contrataciones futures", apunta la organización.

Asistieron a les funciones 32 centros escolares de Gijón y 14 centros del restu de Asturies, un total de 3.631 alumnos (3.046 y 585, de manera respeutiva) d'Infantil y Primaria. "L'oxetivu ye que los nuesos neños y mozos puedan tener una aproximación a les artes escéniques, y convertise nesos espectadores futuros que los teatros y espacios escénicos necesiten", declaró Ana Montserrat López Moro, conceyala de Cultura, Mocedá y Museos.

"Tamos mui satisfechos colos llogros consiguíos na edición actual de FETEN. Algamáronse de forma amplia los oxetivos propuestos, tanto en términos de participación del públicu como nel ámbitu profesional", espresó pela so parte Aitor Martínez Valdajos, direutor de la Fundación Municipal de Cultura, Educación y Universidá Popular, ésitos que "nos motiven a siguir evaluando y revisando les nueses estratexes p'afitar oxetivos a alcanzar pa la edición del añu próximu".

Na imaxe, semeya promocional de 'Vivo Vivaldi', de 10&10 Narváez, Runde, Sanz; función que peslló esta edición de FETEN.