Xixón prepara yá l’Antroxu

El día 9, Xueves de Comadres, arranca l’Antroxu y Xixón yá se prepara pa cinco xornaes de folixa, gastronomía y mazcaritos. Divertia yá fixo públicu’l programa de la fiesta, que caltién la versión n’asturianu, al igual que l’idioma nel cartelu oficial, y el nome de la sardina: Turbu.

Ésti ye’l nome curtiu, porque’l completu ye ‘Turbulencia Marina de las Isobaras Rebeldes’. Ensin saber entovía cuál va ser el so tráxicu final, anima yá a les y los xixoneses a preparáse a una cita marcada en coloráu nos calendarios.

El Llunes d’Antroxu, que nesta ocasión cai’l 12, ye’l día central de les celebraciones, col desfile ente El Bibio y L’Humedal previstu a les 19 hores y una llarga folixa nocherniega. El Martes d’Antroxu, festivu llocal, los restoranes del conceyu enllenaránse de visitantes pa disfrutar del Menú d’Antroxu con pote, picadiellu, frixuelos y picatostes que yá se va poder solicitar nos establecimientos participantes dende’l mesmu xueves.

Otros atractivos son el XXXVI Concursu de Charangues, que siempre dexa pequeñu’l Teatru Xovellanos, y el nuevu concursu de chigres antroxaos. El fin de les celebraciones va llegar el martes col veloriu de Turbu a les 17 hores en Begoña, del que se va encargar Escenapache, col cortexu fúnebre previstu pa les 19.15 hores y la llectura del so testamentu a les 20.15 hores na plaza’l Marqués.