Les cigarreres protagonicen la primer actividá al rodiu la muestra 'Asturianes'

Va consistir nun alderique nel que van participar los direutores del documental 'Cigarreres' y ex trabayadores de la fábrica de Cimavilla.

Son ún de les venti muyeres y coleutivos qu'Alicia Álvarez recueye nel so llibru 'Asturianes', asoleyáu por La Fabriquina y editáu na so versión n’asturianu por Araz, empresa editora tamién de YeXixon.com, y el primeru de los escoyíos pa protagonizar dalguna de les siete actividaes entamaes pola Oficina de Normalización Llingüística y la Universidá Popular como complementu a la esposición homónima que se pue visitar na sala 3 del Antiguu Institutu. Les cigarreres protagonicen un alcuentru que va tener llugar a les 19 hores nel centru cultural, finalmente nel salón d'actos.

Alejandro Nafría y Pablo A. Quiroga van xuntase con delles de les protagonistes del so documental, ex trabayadores de la Fábrica de Tabacos, nesta charra-alderique entitulada 'Cigarreres. L'alma de Tabacalera' que va servir p'aplaudir l'empoderamientu femenín y reconocer el so papel na historia de la villa. La cita próxima del programa al rodiu la esposición 'Asturianes' va ser el sábadu nel Aula de Cocina del Centru Municipal Integráu d'El Llano, el taller 'Nos fogones de María Luisa García' a cargu d'Ana Cifuentes, pal que s'escosaron les 12 places disponibles en menos d'una hora.

Na semeya, ilustración de María Ortiz sobre les cigarreres pal llibru 'Asturianes' que, na esposición, fai d'escenariu pa la realización de semeyes.