Cine asturianu d'autor: 'Contracampos'/'Hilos'

Dos de los máximos esponentes del cine asturianu d'autor xúnense en Llaboral Cinemateca pa ufrir una sesión especial qu'apella a la nuesa historia, a los tropezosos caminos de la nuesa memoria, reviviéndola al traviés de les sos obres más recientes: 'Contracampos' de Ramón Lluís Bande (Xixón, 1972) y 'Hilos' de Tito Montero (Uviéu, 1978), qu'estrenaron na edición pasada del Festival Internacional de Cine de Gijón/Xixón.



'Contracampos'

Contracampos ye l'intentu de (re)construyir un paisaxe. Un área recreativa y un campu de tiru, a la oriella del mar Cantábricu, qu'ente'l 1937 y el 1943 agospiaron un campu de concentración del franquismu pel que pasaron miles de republicanos –milicianos primero, guerrilleros, y los sos familiares más tarde–. Compartiendo col espectador una observación pausada, la película pretende resignificar esi espaciu, devolve-y el so significáu políticu. Peru no se trata de mostrar –de filmar– lo invisible, sinón de facer ver no que güei esiste aquello que falta. Lo que tuvo y yá nun ta, nin siquier nel recuerdu de la xente.

Añu: 2022.

Llargor: 23 minutos.

Idioma: ensin diálogos, con testos n'asturianu.



'Hilos'

Nel primer branu de la pandemia, Tito Montero llevó na mano una cámara comprada recién. Foi la primer ocasión na que daquién grabó a la so familia. Ocho décades enantes, el 1 de agostu del 1937, Felipe García Moro morrió na Batalla del Cimeru. Nun esisten imáxenes suyes. La xeneración del primer archivu audiovisual familiar coincidió cola busca de dalgún rastru de la vida d'un güelu que, hasta entós, nunca esistió. ¿Inflúi la condición de clase na memoria? ¿A qué tipu de persones pue esborrase de la Historia?

Añu: 2022.

Llargor: 83 minutos.

Idioma: asturianu y castellanu.
Hora: 19h