La fotografía industrial protagoniza’l calendariu del 2023 del Pueblu d’Asturies y la Oficina de Normalización

Trece semeyes de José Luis Acuña (Foto Acuña) formen el calendariu del 2023 que vienen estos años asoleyando’l Muséu del Pueblu d’Asturies y la Oficina de Normalización Llingüística con gran ésitu. Lleva’l nome de ‘Fecho en Xixón’ y dedícase a la fotografía industrial.

Depués de repasar décades pasaes, la última la de los 70, nesta ocasiones los xixoneses que tolos años escosen esti calendariu van poder ver na parede de les sos cases imáxenes de fábriques, talleres y trabayadores de la villa tomaes a partir del 1960. Asina, en portada rescampla una semeya aérea de la Fábrica de Loza La Asturiana SA y del barriu d’El Natahoyo y, yá nel interior, de los talleres de Moreda nel 1960 (xunetu) y1965 (xineru), de La Industria y Laviada nel 1980 (abril), de la fábrica de motos Avello Puch tamién nel 1980 (ochobre) o del astilleru de Juliana nel 1975 (avientu), ente otros.

Acuña (1926-2008) nació en Madrid pero llegó a Xixón con 8 años pa quedar, formándose colos fotógrafos Ceñal y Leuman, lo que-y permitió deprender a retocar negativos y a facer semeyes d’estudiu. A los 24 años entama’l llabor como fotógrafu de cai y nel 1951 abrió estudiu y llaboratoriu propios, onde llogró sonadía como retratista.

Foi nel 1960 cuando entamó cola fotografía industral con unes primeres semeyes nos talleres de Moreda a les que dio continuidá n’otros sectores industriales de la villa, dexándonos ayalgues como les qu’inclúi’l calendariu. El so archivu fotográficu ingresó nel Muséu del Pueblu d’Asturies en 2021 gracies a la donación de los sos fíos.

Refrán y códigu QR

Como ye vezu, cada mes del añu vien acopañáu d’un refrán asturianu. Amás, toles páxines vienen con un códigu QR impresu que permite treslladase a la realidá actual de los mesmos llugares qu'apaecen nes semeyes y informase bien sobre ellos.

Los interesaos en contar con ún pueden recoyelu de baldre –máximo un exemplar per persona– dende güei na receición de Centru de Cultura Antiguu Institutu y nel Muséu del Pueblu d’Asturies. Recomiéndase nun dexar pasar el tiempu, yá que ye habitual que s’escosen rápido dada la demanda.