El Sporting va abrir la participación en Copa visitando al Beasain

El sortéu de la primer ronda de Copa crució al Sporting con un rival de Segunda RFEF, el Beasain. El partíu va xugase a partíu únicu nel campu de Loinaz, de prau artificial de xeneración última y capacidá pa 1.500 espectadores, onde’l Sporting B dio na 2016-2017 un gran pasu pal ascensu a Segunda B al empatar 2-2 na ida de la eliminatoria final.

La vuelta en Mareo finaba con un contundente 5-2 y, dende entós l'equipu vascu nun pudo dar el saltu de categoría hasta esti añu. Fíxolo depués de finar segundu en Tercera RFEF, superar la fase final y eliminar al Txantrea navarru, tornando asina 20 años depués a competiciones estatales.

Agora’l rival del Beasain va ser el primer equipu del Sporting, que va xugar el pase a partíu únicu la fin de selmana del 13 de payares. Nel so retornu compite nel grupu 2, onde ocupa'l puestu decimoterceru, con 10 puntos, 1 perriba del descensu que marca la Mutilvera.

La mayor parte de xugadores del cuadru guipuzcoanu son del país, col mediocentru de 21 años cedíu pola Real Sociedad, Julen Zubillaga, como gran referencia. Dirixe al equipu Igor Gordobil, de 51 años con esperiencia nel Leoia y nel Vitoria en Segunda B, que llegó al equipu en xineru del 2021.

Hasta octavos

La temporada pasada’l Sporting llegó hasta octavos de final, onde cayó nos penaltis col Cádiz depués d’empatar ensin goles al final del tiempu reglamentariu. Enantes eliminara al UC Ciares (0-1), Alcorcón (2-1) y Villarreal (2-1).

Na semeya, l'ex xugador del Uviéu y capitán actual del Tenerife, Aitor Sanz, muestra la papeleta del Sporting.