El Telecable busca en casa la so sesta Copa d’Europa

El Palaciu de Deportes acueye esta fin del selmana la final a cuatro de la Copa d’Europa, a la que se clasificaron el Telecable Solimar Xixón, dos equipos catalanes y ún portugués. El rival en semifinales de les de La Calzada, que buscan el so sestu títulu continental –l'últimu ganólu na temporada 2017-2018–, ye’l Cerdanyola CH Feníe Energía.

L’equipu de ḥoquei patinos femenín entrenáu por Fernando Sierra cambia la pista del pabellón de Mata-Xove, con aforu pa unos pocos centenares de persones, pola nueva instalada nel Palaciu col oxetivu d’acoyer a más aficionaos qu’ayuden, como asocedió nel 2010, a que la copa quede en casa. La respuesta de los xixoneses ta asegurada y s’espera una bona entrada pal partíu del sábadu, previstu pa les 19.30 hores.

Enfrente’l Telecable va tener un equipu bien conocíu, como’l Cerdanyola. Les catalanes van quintes en Lliga con 47 puntos, polos 59 de les xixoneses, segundes empataes col líder, el Vila-Sana, pero nun van ser un rival fácil

Na fase de grupos de la nomada Female League Cup finaron segundes, per detrás del Generali HC Palau de Plegamans, que se va enfrentar a les 16.30 hores al Benfica. La final ta prevista pal domingu a les 18 hores.

Les entraes pa cada xornada tienen un preciu de 10 euros, mentes que l’abonu cuesta 15 euros, cantidaes que baxen a 5 y 8 euros pa moces y mozos de 12 a 18 años, mentes que les socies y socios entren de baldre. Tolos partíos van ser televisaos na rede per World Skate Europe TV, pero tamién se van poder ver peles autonómiques RTPA y Esport3.