Xixón Tours recupera esta Selmana Santa la visita n’asturianu per Cimavilla centrada en crímenes y misterios del barriu

La historiadora Arantza Margolles va conducir un añu más ‘Xixón mete mieu’, la ruta guiada n’asturianu entamada por Xixón Tours que percuerre los llugares más prietos de Cimavilla. Va haber salíes el Vienres y Sábadu Santu pa visitar edificios y llugares venceyaos con crímenes y misterios vivíos nel pasáu nel barriu altu.

Esta salida ye una de les más demandaes de les propuestes por Xixón Tours, iniciativa que naz de la plataforma d’información sobre ociu y turismu VerAsturies.com y Cuatro Gotes Producciones, col sofitu de la Fundación Municipal de Cultura, Educación y Universidá Popular. Per hora y media de llargor los participantes van percorrer “el Xixón más escuru: crímenes, lleendes y edificios que fueron escenariu de los mayores misterios y asesinatos del Xixón del que yá naide fala. Una ruta pel Xixón negru nel que descubrir l’orixe de munches creencies y les hestories más macabres peles cais de Cimavilla”.

Nesta convocatoria nueva pa Selmana Santa la salida va tener llugar dende la plaza’l Marqués, frente a la estatuta de Pelayo, el vienres y el sábadu a les 20.30 hores, pa finar en Campu Valdés. El preciu ye de 10 euros, de 8 pa rapazos de 13 a 18 años y de baldre pa neños, pagu qu’ha facese en mano minutos enantes d’arrancar la visita guiada.

La incripción pue facese al traviés del corréu electrónicu xixontours@verasturies.com o rellenando esti formulariu.