Un encuesta fecha en Xixón pescuda les creyencies y percepciones populares sobre la diversidá llingüística

Ramón d’Andrés y Miguel Rodríguez Monteavaro son los autores de 'La diversidá llingüística d'España y d'Asturies. Encuesta na ciudá de Xixón, 2017', trabayu que ta disponible agora pa la so consulta gracies a una edición de Trabe. La investigación va presentase en La Buena Letra.

La encuesta tien como oxetivu “pescudar nes creyencies y percepciones populares sobre la diversidá llingüística d’España y d’Asturies”. Fíxose nel 2017 gracies a una aportación del Conceyu de Xixón y nel 2021 editóse al recibir financiación de la Universidá d’Uviéu nel so programa d’Ayudes pal Caltenimientu d’Actividaes d’Investigación de Grupos d’Investigación Reconocíos 2021.

Los dos autores, miembros entrambos del grupu d’investigación universitariu Seminariu de Filoloxía Asturiana, encuestaron a 60 persones del conceyu de trés tramos d’edá diferente y trés niveles d’instrucción. En total presentaron-yos 36 entrugues que s’agruparon nos apartaos siguientes: Llingües y dialectos; Glotodiversidá española; Glotónimu del castellanu; Variedaes del castellanu; Les variedaes llingüístiques d’Asturies; El castellanu n’Asturies; La fala de Xixón; L’asturianu: glotónimu; L’asturianu: llingua o dialectu; L’asturianu: comparanza con otres llingües; y Variedaes del asturianu.

A lo llargo del llibru repásase cada entruga, col so enunciáu, la xustificación de facela, tables y gráfiques de resultaos, y la so interpretación y otros comentarios. Ente tables y gráficos (estos en color) sumen en xunto 185 figures.

La encuesta “ofrez datos enforma interesantes, como la percepción que tien la xente de lo que ye una ‘llingua’ y un ‘dialectu’, cómo l’asturianu encaxa nesos conceptos, qué llingües d’España enumera la xente cuando se-yos pide facelo, cómo perciben la diversidá dialectal dientro del castellanu, cómo-yos suenen les llingües d’España, qué noción tien la xente de la realidá llingüística d’Asturies, etcétera”. D’esti ‘esame’ sobre cuestiones glotolóxiques o estrictamente llingüístiques, d’acuerdu coles percepciones o concepciones que los informantes tienen d’elles, “resultarán coincidencies o incoincidencies ente’l saber científicu y el saber popular”.

Asina, mentes que “el saber científicu s’establez d’acuerdu a criterios propios y autónomos de la llingüística, el saber popular sobre les mesmes materies establezse d’acuerdu con criterios mui heteroxéneos onde xueguen siempre un papel importante factores de tipu sociolóxicu, cultural, identitariu, ideolóxicu o políticu", espliquen. La presentación del trabayu va tener llugar esta tarde, a les 20 hores, na llibrería xixonesa La Buena Letra cola presencia de los autores y d’Esther Prieto, de Trabe.

Na imaxe superior, ún de los gráficos del estudiu.