Una esposición pon la mirada nos mil cortinos esistentes n’Asturies

El Muséu del Pueblu d’Asturies inaugura esti xueves una esposición dedicada a los cortinos. Integrada por 30 semeyes de gran valir documental d’estes construcciones de piedra en seco destinada pa protexer los caxellos pa la producción de miel, incorpora tamién paneles informativos con presencia de la llingua asturiana.

‘Cortinos. Colmenares tradicionales del occidente de Asturias’ ye’l nome de l’amuesa, que forma parte d’un proyeutu impulsáu nel 2021 pola empresa La Jurbial Servicios Ambientales con sofitu de la Conseyería de Cultura, Política Llingüistica y Turismu del Principado de Asturias,y la collaboración de la Fundación Oso de Asturias y del propio Muséu Pueblu d’Asturies. L’oxetivu ye difundir esti patrimoniu arquiteutónicu únicu, pa lo que tamién se van ceder materiales gráficos y cartográficos inéditos pa la so catalogación y custodia por parte de la institución museística.

Los sos responsables y comisarios de la esposición son el naturalista Ernesto Díaz (La Jurbial Servicios Ambientales) y el biólogu Javier Naves (Estación Biológica de Doñana-CSIC). Entrambos entamaron o participaron en trabayos d’inventariáu y carauterización d’estes construcciones a lo llargo de los últimos 35 años n’Asturies, Lleón y Galicia.

Nel nuesu país tienen contabilizaos cerca d’un millar, presentando nesta amuesa 30 semeyes de dalgunos d’ellos, que van acompañaes de paneles informativos nel que l’asturianu tien presencia. Nacho Arbesú, collaborador d’Asturies.com y YeXixón, encargóse del proyeutu espositivu.

La inauguración de ‘Cortinos. Colmenares tradicionales del occidente de Asturias’ va tener llugar mañana al meudía cola presencia de Pablo León, direutor xeneral de Cultura y Patrimoniu; Manuel Ángel Vallina, conceyal de Cultura; y Nicanor Fernández, presidente de la Fundación Oso de Asturias. La esposición va tar abierta al públicu na Casa de Valdés del Muséu del Pueblu d’Asturies hasta’l 15 de marzu, cola previsión de que llueu visite otres poblaciones del país.

La donación

De forma paralela a esta amuesa, y como parte del proyeutu, van donase los materiales cartográficos y fotográficos recopilaos polos autores a la institución museística. El material consta de dellos centenares de semeyes, en formatos diferentes, dalgunes con cerca de cuatro décades d’antigüedá, asina como diferentes cartografíes.

D’esta forma los donantes pretenden garantizar la conservación d’estos materiales y que los investigadores puedan tener accesu a ellos.

Na imaxe, cortín en Zreizal, nel conceyu de Tinéu. Semeya obra d'E. Díaz.