Xixón va entrar en nivel d’alerta 4+ y ta pendiente de la decisión del TSXA sobre’l toque de queda

Con una incidencia acumulada a 14 díes de 747,1 casos de COVID-19 cada 100.000 habitantes, mui perriba de los 350 que marca la entrada a nivel d’alerta 4+, Xixón va pasar a tar esti vienres en riesgu estremu. Esta situación va trayer restricciones, como la entrada del toque de queda, pendiente del preste del TSXA.

El Conseyu de Gobiernu alcordó esta mañana pidi-y permisu pa poder aplicar aquelles midíes qu’afeuten a derechos fundamentales, en concreto’l toque de queda de 1 a 6 hores y la llende de 6 persones non conviviente n’axuntamientos n’interiores y de 10 n’esteriores, a 8 conceyos, ente ellos Xixón. El paquete de midíes y recomendaciones va activase’l llunes per 14 díes, sacante éstes dos restricciones concretes que lo fadrán nel momentu nel que se pronuncie’l tribunal.

Carreño, Gozón, Llaviana, Mieres, Uviéu, Siero y Villaviciosa son los otros conceyos na mesma situación que Xixón, onde la curva ta empezando a baxar. La mayor incidencia de la cuarta fola algamóse’l vienres, con 839,11 casos, momentu nel qu’empezó a baxar hasta los 747,1 actuales –l’actualización última correspuende al martes–.

Les condiciones pa entrar nel nuevu 4+ son tar trés díes siguíos con grau mediu d'ocupación hospitalaria nel país, esto ye, un 5 por cientu en cames convencionales y un 10 por cientu UCI, y superar una incidencia de 350 per otros 3 díes, dalgo que Xixón va cumplir esta medianueche. L’oxetivu de la midida ye rebaxar la tresmisión pa non saturar la sanidá.