La renta media de la vivienda en Xixón asítiase en 550 euros

L’estudiu ‘Vivienda vacía y n’alquiler en Xixón’, encargáu pol Conceyu, pretende servir de base pa poner en marcha polítiques municipales pa fomentar l’alquiler y facilitar el so accesu a les persones más vulnerables. La renta media d'una vivienda de 70 metros cuadraos ye de 550 euros na villa, onde hai 7.000 vacíes.

Si miramos aquelles que se cataloguen como “vacíes o infrautilizaes’ esti númberu dóblase. Son los principales datos del informe del que ye responsable José Pablo Calleja, profesor de Socioloxía de la Universidá d’Uviéu.

La renta media de 550 euros pa viviendes d’una superficie media de 70 metros cuadraos, que convierten a Xixón nel conceyu más caru del país, dificulta l’accesu al mercáu de vivienda d’alquiler a les persones en situación de mayor vulnerabilidá. Los barrios más esclusivos tán nel centru y este, con precios sobre los 600 euros, y los más baratos nel sur y oeste, al rodiu los 500.

Los propietarios prefieren la venta al alquiler, principalmente pol “mieu a impagos o estrozos”, que l’informe considera, sicasí, “relativamente esceicionales”. Ello impide que s’incremente la ufierta y mayores dificultaes pa presentar les garantíes o los ingresos estables que cada vez más esixen los propietarios.

Les conclusiones

El documentu va ser el puntu de partida d’una xornada de trabayu con toles entidaes y persones que formaron parte del estudiu que se va celebrar en seronda. Les conclusiones del mesmu pa fomentar l’alquiler y facilitar el so accesu a les persones más vulnerables son les siguientes: fomentar la cultura del alquiler, movilizar la vivienda vacía per aciu incentivos fiscales y nos gravámenes, incrementar el parque de vivienda pública n’alquiler magar que’l qu’hai yá ye importante, facer un rexistru de viviendes vacíes d’obligada inscripción pa sociedaes anónimas y limitadas, reforzar las midíes llegales de garantíes y seguridá pa los propietarios, apoyar a deudores de bona fe, fomentar la dación en pagu o alquiler d’inmuebles vacíos de grandes tenedores, reforzar el control d’ayudes económiques al alquiler, y fortalecer la mediación y intervención téunica y los procesos d’acompañamientu social.