La ‘Semana Negra’ torna a tomar la cai

La ‘Semana Negra’ recupera esti añu, na trentena cuarta edición, parte de la so normalidá. El certame lliterariu al rodiu la novela prieta torna a la cai depués de la edición pasada, marcada poles restricciones de la pandemia qu’obligó a celebrar l’eventu nel Antiguu Institutu, y toma como allugamientu El Muelle.

Ensin ferial nin ‘Tren Negro’, daes les circunstancies, l’actividá sí sal al esterior nesta ocasión, con dos carpes instalaes nel paséu y los tradicionales puestos de llibros. Amás, va haber espaciu pa llugares de venta d’artesanía y ropa, y una pequeña zona d’hostelería con pulpería.

L’aforu de les carpes ye de 130 y 60 persones, y les entraes p’acceder a les diferentes alcuentros, presentaciones y conciertos pónense a disposición del públicu na web de la ‘Semana Negra’ a les 9 hores del día anterior a la cita. Amás, va emitise la señal en direuto per Internet.

La XXXIV ‘Semana Negra’, qu’arranca güei, va tener el llargor habitual de diez díes y apertura a les 11 hores, con autores de primer nivel, como ye vezu. Un total de 150 de dellos países, como Carlos Bardem, María Dueñas, Rosa Montero, Paolo Bacilieri, Michelle Roche, Alexis Nolent, Claudia Piñeiro, Luis Rendueles o Marta Robles, ente otros.

Firma de llibros en Trabe

Nos puestos de llibros va tar un añu más Trabe, qu’esti añu entama firmes de dos hores de llargor. Mañana va tar Ovidio Paredes (17 hores) y los díes siguientes Inmaculada González-Carbajal (domingu, 12 hores), Xuan Xosé Sánchez Vicente (llunes, 19 hores), Francisco ‘Paco’ Álvarez (martes, 12 hores), Laura Marcos (miércoles, 19 hores), Nicolás Bardio (vienres, 12 hores) y Nel Morán (sábadu, 12 hores), que van roblar les sos creaciones últimes cola editorial.

Tamién van tener espaciu na ‘Semana Negra’ musicasturiana.com y Puru Remangu, que comparten puestu.

Semeya propiedá de la 'Semana Negra'.