'Cine María Cristina', d'El Callejón del Gato (ESTRENA ABSOLUTA)

Yá nun queda nada. Yá nun queda naide. Yá nada ye igual. Nada ye como enantes. Bono, non too. Nun vieyu cine abandonáu, peslláu vaya vusté a saber cuándo, los ecos de los personaxes qu'un día compraron la so entrada pa suañar con otros mundos proyeutaos na gran pantalla, siguen resistiéndose a les marees del tiempu.

Tampoco esa pantalla nun sobrevivió al escaezu. Y agora nella, les úniques imáxenes proyeutaes, son dalgunos restos d'aquellos besos, ilusiones y despidíes en blancu y prietu, esbillaes pola censura y el polvu de la memoria.

El Cine María Cristina nun pue pesllar, nun ye posible. Non, mientres tu sigas suañando la so historia. Non, mientres tu sostengas con fuercia la to entrada na mano. Mientres eso siga asocediendo, el nuesu acomodador daráte la bienvenida cola escasa lluz de la so llinterna ayudándote a atopar el to asientu.

Y quiciabes, quién sabe, una mano próxima buscará la tuya na escuridá si l'escuru faise escuru enforma. Pue ser.

• Intérpretes: Ana Eva Guerra, Beatriz Canteli, Borja Roces, Manu Lobo / Marino Villa y Moisés González.
• Dramaturxa y direición: José Troncoso.
• Ayudante de direición: Marino Villa.

Hora: 20.30h

Preciu: 15 €