El branu xixonés va contar con cuasi 400 actividaes, pero non con Fueos pa Begoña

La iniciativa privada salva la programación musical con actuaciones d'aforu medianu.

Con San Xuan, que nun contó con foguera, arrancó'l branu xixonés. Cuasi 400 actividaes tán previstes estos meses nel conceyu, dende conciertos a actuaciones de teatru, cine, maxa, arte o tradición.

Arte na Cai centra la mayor parte de les actuaciones de músicos asturianos, delegando'l Conceyu la organización de los conciertos d'artistes de sonadía a la iniciativa privada. Metrópoli sigue programando, dende ayeri y hasta'l 25 de xunetu, na plaza de toros actuaciones de nomes como Rozalén (güei), Hombres G (mañana), Rulo y La Contrabanda (día 3), Carlos Rivera (11), Ara Malikian (16) o Estopa (24, con entraes yá escosaes), mentes que debuta nel mesmu llugar, del 20 al 29 d'agostu, el festival 'Oye Gijón', cola presencia de Nathy Peluso (21) o Natalia Lacunza (27).

El Tsunami Xixón aplázase al 2022 pola situación sanitaria, pero los organizadores presenten actividaes tanto na plaza de toros como n'El Molinón, col escenariu mirando al fondu norte y aprovechando la grada. Nel campu del Sporting van actuar grupos indie como Vetusta Morla (22 de xunetu), Izal (29), La M.O.D.A. (5 d'agostu) y Love of Lesbian (7), mentes que n'El Bibio va sonar punk y ska con La Pegatina y Talco Maskerade (30 de xunetu), adaptación de la banda italiana pa tocar en pandemia, y Lendakaris Muertos y The Baboon Show (31), eventos a los que se suma, ente otros, una actuación de Zahara nel Teatru de la Llaboral (8 d'agostu).

Ensin Selmana Grande

Per segundu añu, nun va haber pregón nin Selmana Grande y Nueche de los Fueos pa evitar grandes axuntamientos de xente. Sí tán previstos pequeños conciertos d'artistes asturianos pelos barrios esos díes y, pa lo últimos de mes, la Fiesta de la Sidra Natural, anque ensin récor d'escanciáu o preba popular

Calcando nesti enllaz pue conocer les cuasi 400 actividaes programaes pa estos meses.

Na imaxe, plaza de toros d'El Bibio, onde van tener llugar la mayor parte de los conciertos de más aforu. Semeya obra de Nwalme baxo llicencia CC BY-SA 3.0 ES.