Vallina tomó posesión del so cargu de conceyal

El socialista Manuel Ángel Vallina tomo posesión del so cargu de conceyal nel Plenu últimu en sustitución d’Alberto Ferrao y va encargase de les competencies de Cultura. El Conceyu aprobó por mayoría absoluta la modificación de creitos que permitirá financiar les inversiones previstes pal 2021 na modificación presupuestaria.

El Plenu, telemáticu, contó cola participación per primer vegada de Vallina, que prometió’l so cargu na Casa Conceyu en presencia de l’alcaldesa Ana González Rodríguez. Darréu desendolcóse la sesión, onde se dio’l preste al alcuerdu de la xunta de gobiernu p’axudicar a Caja Rural de Asturias el contratu de préstamu a llargu plazu destináu a financiar les necesidaes del presupuestu prorrogáu del 2020.

Esti préstamu, autorizáu pola Conseyería de Facienda, que tien atribuyida la tutela financiera nel país, financiará les inversiones pal 2021 previstes na modificación presupuestaria. El plazu máximu d’amortización será de 10 años, con un periodu de carencia dende la firma del contratu hasta’l 31 d’avientu del 2021, y un tipu d’interés d’EURIBOR a trés meses más un diferencial de 14 puntos básicos (0,14 por cientu).