Xixón busca llegar al turista con una nueche d’hotel de baldre y promoción en castellanu

‘Gijón te merece’ ye’l nome del plan que va poner en marcha’l Conceyu pa reactivar el sector turísticu esti branu, promoción na que s'escaez el topónimu asturianu. Va consistir nuna nueche d’hotel de baldre al contratar dos pa disfrutar del 16 de mayu al 30 de setiembre.

Un operador turísticu va encargase de la xestión de les reserves y de la publicidá con aiciones na so web, boletín electrónicu, blogue y redes sociales, y una campaña de co-marketing n’otres plataformes en llinia. El preciu va dir d’ente los 90 a los 210 euros, según la categoría del agospiu, y inclúi l’almuerzu.

Xixón Turismu dedica 400.000 euros a ‘Gijón te merece', una promoción que podrán disfrutar 6.840 turistes nel casu de completar tola ufierta disponible. La venta va entamar nel momentu que se llevante l’estáu d’alarma, afitáu nesti momentu hasta’l 9 de mayu.