Entama la campaña de vacunación del gripe en siete puntos habilitaos

Baxo’l nome de ‘Protéxite contra’l gripe. Vacúnate. Failo por ti y polos que t’arrodien’ arrancó la campaña de vacunación d’esti añu contra esta enfermerdá, que se desendolca nun contestu marcáu pola pandemia de COVID-19. El Palaciu de Deportes foi’l primer de los siete puntos habilitaos nel conceyu n’abrir les sos puertes.

Dende les 10.30 hores numberosos ciudadanos averáronse a esta instalación deportiva pa recibir la vacuna antigripal. Éstos acudieron a la hora esauta na que tien la cita, nin con antelación nin con retrasu, pa evitar axuntamientos de xente.

Amás del Palaciu, el Serviciu de Salú del Principáu d’Asturies (SESPA) habilitó pa esta campaña, na que s’espera un aumentu de solicitúes, otros seis puntos del conceyu. Son, n’horariu de mañana, los pabellones de Mata-Xove, L’Arena, La Teyerona y el Centru Municipal Integráu de Pumarín-Xixón Sur, y pela tarde los centros de salú de Laviada y Contrueces.

La xente interasao en vacunase, aición recomendada pa tolos mayores de 65 años y persones de riesgu, ha de llamar al so centru de salú pa pidir cita. Asturies dispón de 400.000 dosis, cuasi’l doble que l’añu pasáu.