La FIDMA nun va celebrase pola crisis sanitaria

Esti añu Xixón pierde a ún de los sos eventos más populares, con 724.314 visitantes na edición pasada. El comité téunicu pa evaluar les midíes de seguranza n’eventos públicos decidió por unanimidá refugar la celebración de la FIDMA magar l’esfuerciu fechu pola Cámara de Comercio de Gijón p’adautase a les circunstancies.

La LXIV Feria Internacional de Muestres d’Asturies (FIDMA) va tener que posponese pal 2021. El Gobiernu, la Delegación del Gobiernu estatal n’Asturies y la Federación Asturiana de Conceyos (FACC) nun dieron el preste pa la so organización ente los díes 1 y 16 d’agostu. La razón ye dar prioridá a la salú pública énte un eventu que consideren de riesgu altu poles sos condiciones especiales.

El plan de seguranza presentáu pola Cámara de Comercio de Gijón, qu’afitaba un aforu máximu de 14.071 persones y amplíes midíes en tol recintu ferial, foi valoráu pol Gobiernu, que, sicasí, nun ve garantíes sanitaries na so celebración, nuna decisión que’l presidente Adrián Barbón reconoz impopular. La FIDMA ye un eventu importante pa la economía asturiana, con munchos sectores que centren gran parte de les sos ventes y negocios nesti certame.

Por esti motivu, la organización del eventu ta estudiando entamar otres feries específiques, con menor aforu, pa compensar les perdes que provoca a les empreses l’anulación de la FIDMA. Una podría ser, tamién n’agostu, una dedicada al motor y al llar.

Na imaxe, públicu na edición pasada de la FIDMA. Semeya propiedá de la Cámara de Comercio de Gijón.