El Sporting torna a los entrenamientos dos meses depués

La sesión última foi’l 13 de marzu.

De manera individual, con non más de seis xugadores nel campu y distanciamientu –habilitarónse los númberu 4 y 5– y con un máximu de 12 en Mareo, como marca’l protocolu de LaLiga, tornó’l Sporting a los entrenamientos cuasi dos meses depués. La pandemia de COVID-19 obligó a parar la competición y poro, los entrenamientos, cola declaración del estáu d’alarma.

Entovía ensin fecha concreta pa xugar les 11 xornaes de Lliga que queden en Segunda División, anque se fala del 21 de xunu como posible, los 27 futbolistes del Sporting –incluyíos 6 con fiches del filial– pudieron entrenar baxo les indicaciones del preparador físicu Fran Albert, cola presencia tamién del cuerpu téunicu. El xueves pasáu pasaron les pruebes de COVID-19, ensin positivu nengún.

Ésta ye la fase 2 del protocolu, que se va siguir los díes próximos. Na fase 3, entovía ensin fecha, va permitise los entrenamientos en grupos de 8 xugadores.

Na semeya, captura d'un videu del Real Sporting de Gijón onde se pue ver cómo los futbolistes entrenen guardado les distancies.