Empieza la cuenta atrás pal Antroxu

Xixón yá tien cartelu del Antroxu, que lleva la firma de Juan Diego Ingelmo. La folixa tradicional na so versión moderna va celebrase del 21, depués del Xueves de Comadres, al 25 de febreru, Martes d'Antroxu.

Cola llegada del iviernu, depués del solsticiu, en toda Asturies entamaben les mazcaraes, qu’entá se caltienen en distintos puntos del país. L’Antroxu allargábase per estos meses, anque cola llegada del cristianismu la folixa quedó arrequexada a los díes previos a la Cuaresma.

L’Antroxu modernu en Xixón recuperóse tres la llegada de la Democracia y anguaño, nuna versión moderna que mira más a otros carnavales como’l de Rio de Janeiro, Cádiz o Las Palmas qu’a la tradición, tien un importante puxu ente la población. Esti añu les feches de celebración son del 21 al 25 de febreru.

Cambiu de cartelu

Esta edición comenzó con una pequeña incidencia col cartelu. El ganador, obra de Javier A. Marinas, descartóse por ser mui paecíu al de los Carnestoltes de Grau de Castelló del 2017.

Asina, ‘Meca’ d’Ingelmo, segundu clasificáu, va ser el definitivu. Nella pue vese a una rapacina mazcaritada que sal d’un disfraz de Pelayo que lleva na mano un bastón roxiblancu, nun chisgu al Sporting, cola qu’ayuda a facer un palu de la ‘x’ de la pallabra ‘Antroxu’.