El PAS esixe'l remocicamientu de los baños de les pistes del complexu de Les Mestes

Les tarifes d'usu aumentaron esti 2020, lo que xeneró crítiques de los clubes d'atletismu.

El Partíu Asturianista (PAS) denuncia l'estáu "llaceriosu" de los retretes públicos esteriores de les pistes del Complexu Deportivu Les Mestes. Según indica nun comunicáu, esta situación vien d'atrás y ye causante de "espantu del visitante ocasional; deshonra pa usuarios, familiares y deportistes habituales".

La formación esixe al Conceyu que, "agora que se van xubir los precios a los deportistes por usar les pistes, proceda a eliminar esi estáu impresentable" de los baños, "vergüenza de propios y escándalu d'estraños". Les tarifes nueves tamién foron oxetu de crítica de los clubes qu'empleguen Les Mestes, en concreto pol fechu de que s'obliga a pagar a los deportistes federaos que quieran entrenar fuera del horariu acutáu polos sos equipos, lo que va conllevar a un aumentu del gastu d'éstos.

Na semeya, un retrete de los baños, col agua escapándose de les xuntures.