Los Reis Magos yá tán rumbu a Xixón, onde van llegar per mar el domingu

Acompañaos pol siempre queríu Príncipe Aliatar, Melchor, Gaspar y Baltasar yá tán rumbu a Xixón pa llevar regalos a los xixoneses. Les neñes y neños van esperalos el domingu pela mañana n’El Muelle y, tres participar na cabalgata con salida de Montevil pela tarde, los Reis Magos van ponese a trabayar mientres tola nueche.

La hora prevista de llegada al cai de Xixón ye les 11 hores, siempre que les condiciones de la mar lo permitan. La intención de les sos máxiques maxestaes ye la de saludar a tolos presentes nel so trayeutu hasta la plaza’l Marqués, pa depués participar en dellos actos oficiales.

Los colexos de Montevil, el Montevil y el Severo Ochoa, van convertise nel cuartel xeneral de los Reis Magos. A les 18 hores van salir cola cabalgata en direición a la carretera Carbonera y Schulz hasta Manuel Llaneza, pa metese nel centru per San Bernardo hasta la plaza El Carmen, tirar hacia Marqués de San Esteban y finar nos Xardinos de la Reina.

Yá de nueche, les neñes, neños y adultos que se portaron bien esti añu últimu van recibir les sos recompenses en mou de regalu. El llunes pela mañana toos van poder disfrutar d’ellos.

Na semeya, Melchor l'añu pasáu nel so pasu per Xixón.