L-R axúntase con amigues nun conciertu especial nel Arcu Atlánticu

Muga o un acústicu con cantares de 'Bestiariu' son dalgunes de les munches opciones qu'ufre l'Arcu Atlánticu nel so tramu final.

Mañana, a les 22 hores, la Plaza Mayor va acoyer 'L-R & Amigues' conciertu que tien como oxetivu "xuntar nel mesmu escenariu a les grandes protagonistes de la música tradicional y folk d'Asturies y visibilizar inda más la so presencia y relevancia na escena cultural asturiana", esplica Leticia Baselgas. Ella y Rubén Bada, L-R, van acompañase nesta cita especial con Silvia Quesada, Mapi Quintana, Eva Tejedor, Merce Santos, Andrea Joglar, Marga Lorences y 6 Riales, cola animación al baille del grupu Prau Llerón.

Mentes esta tarde, a les 20.30 hores nel patiu del Centru de Cultura Antiguu Institutu, Muga va tocar per primer vegada n'Asturies. El tríu con sede n'An Orient trai al Festival Arcu Atlánticu 'Chants de femmes des Asturies’, una cita na que va participar Pablo Texón cola llectura de los testos que fixo pa esta propuesta.

Otra manera, mañana, a les 13 hores, la reciella va poder disfrutar na plaza de La Corrada d'una esbilla de los discos de ‘Bestiariu’ –editaos por Araz, empresa editora tamién d’Yexixón.com–. Los conciertos de la Plaza Mayor complétense col d'Anabel Santiago esta nueche y col de la Banda de Música de Xixón, el domingu, dambos a les 22 hores.